अन्नपूर्ण हिमालको प्रथम आरोहणको ७६औँ वर्ष: विविध कार्यक्रमसहित आरोहण दिवस मनाइँदै

अन्नपूर्ण हिमालको प्रथम आरोहणको ७६औँ वर्ष: विविध कार्यक्रमसहित आरोहण दिवस मनाइँदै
म्याग्दी, कास्की, मनाङ र मुस्ताङ जिल्लाको सिमानामा अवस्थित ८,०९१ मिटर अग्लो अन्नपूर्ण हिमाल को प्रथम सफल आरोहण भएको ७६ वर्ष पूरा भएको छ। सन् १९५० जुन ३ मा फ्रान्सेली पर्वतारोही Maurice Herzog र Louis Lachenal को टोलीले अन्नपूर्णको शिखरमा पहिलो पटक मानव पाइला राखेको थियो।

यही कारण अन्नपूर्णलाई ८ हजार मिटरभन्दा अग्ला हिमालहरूमध्ये ‘जेठो हिमाल’का रूपमा चिनिन्छ।
अन्नपूर्ण हिमालको आधार शिविर म्याग्दी जिल्लाको नारच्याङ क्षेत्रमा पर्दछ। अन्नपूर्णको सफल आरोहण भएको तीन वर्षपछि मात्रै सगरमाथा को सफल आरोहण भएको थियो।
नेपालमा पर्वतारोहण तथा पर्यटन विकासको सुरुआतको प्रतीकका रूपमा आज अन्नपूर्ण आरोहण दिवस विभिन्न कार्यक्रम गरी मनाइँदै छ। यस अवसरमा अन्नपूर्ण गाउँपालिका को आयोजनामा घान्द्रुकतर्फको आधार शिविर क्षेत्रमा दौड प्रतियोगिता सञ्चालन गरिएको छ भने नयाँ पदमार्गको प्रवर्द्धनका लागि दोर्दी गाउँपालिका मा पनि विशेष कार्यक्रम आयोजना गरिएको छ।

पर्यटन विभागका अनुसार अघिल्लो वर्षसम्म ५३६ जनाले अन्नपूर्ण हिमालको सफल आरोहण गरिसकेका छन्। यस वर्षको वसन्तयाममा चार समूहका २७ जनाले आरोहण अनुमति लिएका थिए भने सफल आरोहणको अद्यावधिक विवरण संकलन भइरहेको छ।
दिवसको अवसरमा आधार शिविरदेखि नारच्याङसम्मको ३६ किलोमिटर दूरीमा खुला दौड प्रतियोगिता, सांस्कृतिक कार्यक्रम तथा पुरस्कार वितरण समारोह आयोजना गरिएको छ। प्रतियोगितामा प्रथम हुनेलाई एक लाख रुपैयाँ, द्वितीयलाई ६० हजार रुपैयाँ, तृतीयलाई ३५ हजार रुपैयाँ तथा सान्त्वना स्थान हासिल गर्ने तीन जनालाई जनही १० हजार रुपैयाँ नगद पुरस्कार प्रदान गरिनेछ।
दौड प्रतियोगिता नेपाल भूतपूर्व खेलाडी मञ्च र गण्डकी प्रदेश एथलेटिक्स सङ्घ को प्राविधिक सहयोगमा सम्पन्न भइरहेको छ। दिवसको समापन नारच्याङमा सांस्कृतिक कार्यक्रम तथा पुरस्कार वितरण समारोहसँगै गरिने आयोजकले जनाएको छ।